No confín dos verdes castros. Guía de itinerarios

Guía de itinerarios
Xosé Manuel Varela
Concello de Cabana de Bergantiños / Turismo de Cabana, 1999

No ano 1999, o Concello de Cabana de Bergantiños ideou un proxecto de divulgación turística do cal formaba parte esta guía de itinerarios e o CD No confín dos verdes castros do grupo folc Milladoiro. Libro e CD ofrécense nun mesmo lote. 

A guía presenta oito itinerarios turísticos que percorren a totalidade do concello na procura de infinitos recursos de interese turístico e cultural. Toda Cabana está nestas rutas, deste as grandes xoias turísticas como A Cidá de Borneiro ou o dolmen de Dombate, ata pequenos lugares con algún elemento patrimonial digno de ser mostrado e coñecido. Cada un destes roteiros autoguiados vai abundantemente ilustrado con mapas e fotografías. Salientan do libro as dobres páxinas dedicadas á enseada da Insua, á torre da Penela, á romaría de San Fins do Castro, ó castro A Cidá de Borneiro e ó dolmen de Dombate. O volume complétase cunha ampla guía de hostalería, enderezos de interese, celebracións festivas e bibliografía. É unha publicación trilingüe: galego, castelán e inglés.