Cabana encabeza o Consello de Dirección do ‘Proxecto Anllóns’ e inicia a súa andadura

Sen definir

O alcalde de Cabana, xunto ao vicepresidente da Deputación da Coruña e deputado de Turismo, Xosé Regueira, presidiu esta mañá a xuntaza na que se constituiu formalmente o Consello de Dirección do ‘Proxecto Anllóns’. A reunión, que tivo lugar no Concello de Cabana de Bergantiños, tamén serviu para presentar a empresa que se ocupará de realizar a diagnose medioambiental e unha proposta de actuacións turísticas sustentables para a contorna do río Anllóns.

O Consello de Dirección do ‘Proxecto Anllóns’ está conformado por dúas persoas representantes da Deputación e dúas de cada concello integrante da comunidade intermunicipal e está presidido polo concello de menor poboación, Cabana de Bergantiños, representado polo seu alcalde José Muíño. Na xuntanza desta mañá, ademais de Xosé Regueira e José Muíño, tamén estiveron presentes os alcaldes de Carballo, Evencio Ferrrero, de Coristanco, Juan Carlos García Pose, de Ponteceso, Xosé Lois García Carballido, e o tenente de alcalde da Laracha, José Ramón Martínez Barbeiro; así como persoal técnico de Turismo dos concellos e da Deputación.

Convén lembrar que este proxecto, que bota a andar tras a sinatura dun convenio entre Deputación e os cinco concellos a pasada semana, en por obxecto preservar a biodiversidade e o patrimonio natural propio desta comarca, a través de accións de recuperación do bosque de ribeira e a erradicación da flora alóctona e plantas invasoras en ámbitos próximos ao río, que serán complementadas con accións divulgativas entre a comunidade escolar.

Entre as iniciativas a incluír no proxecto tamén se valorarán as relacionadas co patrimonio inmaterial e a identidade cultural relacionada co río Anllóns, como poden ser a recuperación de sendeiros de pescadores, a posta en valor de lendas e de historias de tradición oral ou iniciativas relativas a infraestrutuas fluviais como minicentrais ou muíños de batán.